మహేంద్ర సింగ్ ధోని ఇండియన్ ప్రీమియర్ లీగ్ (ఐపీఎల్) 2025 సీజన్‌లో రిటైర్మెంట్ గురించి మళ్లీ చర్చనీయాంశంగా మారింది. ధోని ఐపీఎల్ నుంచి తప్పుకోబోతున్నాడని గత కొన్ని సంవత్సరాలుగా ఊహాగానాలు వినిపిస్తున్నాయి. అయితే, ఈ సారి రాజ్ షమనితో జరిగిన ఒక పాడ్‌కాస్ట్‌లో ధోని తన ఆలోచనలను చాలా స్పష్టంగా వెల్లడించారు. ఆయన చెప్పిన మాటలు ఆయన ఆట పట్ల, భవిష్యత్తు పట్ల ఉన్న వాస్తవిక దృక్పథాన్ని చూపిస్తున్నాయి.
ఏప్రిల్ 5, 2025న చెపాక్ స్టేడియంలో ఢిల్లీ క్యాపిటల్స్‌తో జరిగిన మ్యాచ్‌లో సీఎస్‌కే ఓడిపోయింది. ఈ మ్యాచ్‌లో ధోని తల్లిదండ్రులు స్టేడియంలో కనిపించడంతో ఊహాగానాలు మొదలయ్యాయి. సీఎస్‌కే హెడ్ కోచ్ స్టీఫెన్ ఫ్లెమింగ్ ఈ విషయంలో స్పష్టత ఇచ్చారు. “ధోని చాలా బాగా ఆడుతున్నాడు. ఆయన ఆటలో ఎలాంటి ఇబ్బందులు లేవు,” అని ఫ్లెమింగ్ అన్నారు. ఇది అభిమానులకు కొంత ఊరటనిచ్చినప్పటికీ, ధోని భవిష్యత్తు గురించి చర్చలు ఆగలేదు.
అయితే ధోని తన రిటైర్మెంట్ గురించి మాట్లాడుతూ
“నేను ఐపీఎల్ ఆడటాన్ని చాలా సింపుల్ గా చూస్తాను. ఒక సంవత్సరం చొప్పున ముందుకు వెళ్తాను. ఇప్పుడు నాకు 43 ఏళ్లు. ఈ సీజన్ (2025) ముగిసే సమయానికి నాకు 44 ఏళ్లు వస్తాయి. సీజన్ అయ్యాక నాకు 10 నెలల సమయం ఉంటుంది. అప్పుడు మరో సంవత్సరం ఆడాలా, వద్దా అని ఆలోచిస్తాను. కానీ ఆ నిర్ణయం నేను తీసుకోను. నా శరీరం ఎలా ఉంటుంది, ఆడే స్థితిలో ఉంటుందా అనేది చూసి నిర్ణయం తీసుకుంటాను.” అన్నారు
ఈ మాటల ద్వారా ధోని తన ఫిట్‌నెస్‌పై ఎంత శ్రద్ధ చూపిస్తారో, తన కెరీర్‌ను ఎంత వాస్తవికంగా చూస్తారో తెలుస్తుంది. ఆయన వయసు పెరుగుతున్నప్పటికీ, ఆట పట్ల ఉన్న అంకితభావం, శారీరక దృఢత్వాన్ని కాపాడుకోవడం వంటివి ఆయనను ఇంకా ఆడే స్థితిలో ఉంచుతున్నాయి. సీఎస్‌కే యాజమాన్యం కూడా ధోని 2025 తర్వాత కూడా ఆడాలని ఆశిస్తోంది. జట్టు సీఈవో కాశీ విశ్వనాథన్ కూడా గతంలో ఇలాంటి సీజన్లలో ధోని ఆడుతూనే ఉంటాడని చెప్పారు.
ధోని సీఎస్‌కేకి కేవలం ఆటగాడు మాత్రమే కాదు, ఒక భావోద్వేగ సంబంధం. ఆయన ఐదు ఐపీఎల్ టైటిళ్లు గెలిచి, జట్టును అద్భుతంగా నడిపించారు. అభిమానులు ఆయనను “తల” అని పిలుచుకుంటారు. ఈ బంధం వల్లే ఆయన రిటైర్మెంట్ గురించిన ప్రతి అప్‌డేట్ అభిమానుల్లో ఆసక్తిని, ఆందోళనను రేకెత్తిస్తుంది. ఇప్పటికీ ధోని వికెట్ కీపింగ్‌లో చురుకుదనం, బ్యాటింగ్‌లో ఫినిషింగ్ స్కిల్స్ చూపిస్తూ జట్టుకు కీలక ఆటగాడిగా ఉంటున్నారు.
అయితే, ధోని తన తదుపరి అడుగు గురించి ఏం నిర్ణయిస్తాడు? ఇది ఆయన శారీరక స్థితిపైనే ఆధారపడి ఉంటుందని ఆయన స్పష్టం చేశారు. అభిమానులు, సీఎస్‌కే టీమ్, క్రికెట్ ప్రపంచం అంతా ధోని ఇంకా కొనసాగాలని కోరుకుంటున్నారు. ఆయన తీసుకునే నిర్ణయం కోసం అందరూ ఆసక్తిగా ఎదురుచూస్తున్నారు.
