సూపర్‌స్టార్‌ మహేష్ బాబు మనీలాండరింగ్‌ (Money Laundering Case) కేసులో ఆరోపణలు ఎదుర్కోవడం సంచలనం రేకెత్తిస్తోంది. హైదరాబాద్‌కు చెందిన సురానా గ్రూప్, సాయి సూర్య డెవలపర్స్‌లకి చెందిన రూ.100 కోట్ల మనీలాండరింగ్‌ కేసులో ED (ఎన్‌ఫోర్స్‌మెంట్‌ డైరెక్టరేట్‌) ఆయన్ను ప్రశ్నించనుంది. ఏప్రిల్‌ 28న మహేష్ బాబు హైదరాబాద్‌లో ED ముందు హాజరు కావాలని సమన్లు జారీ అయ్యాయి. ఈ వార్త “Telugu Cinema” అభిమానులను షాక్‌లో ముంచెత్తింది.
కేసు ఏమిటంటే?
రియల్‌ ఎస్టేట్‌ కంపెనీలు సురానా గ్రూప్, సాయి సూర్య డెవలపర్స్‌ ప్లాట్ల విక్రయం పేరుతో జనాన్ని మోసం చేసినట్లు తీవ్ర స్థాయి ఆరోపణలు వచ్చాయి. ఒకే ప్లాట్‌ను చాలా మందికి అమ్మడం, డబ్బులు తీసుకుని కూడా రిజిస్ట్రేషన్‌ చేయకపోవడం, ఒప్పందాలు లేకుండా మోసం చేయడం ద్వారా చాలామందిని మోసం చేసినట్లు వెల్లడైంది. ఈ వ్యవహారంలో చాలా మంది సామాన్యులు డబ్బు కోల్పోయారు.
ఇటీవల ఈడీ (ED) ఈ కంపెనీలపై దాడులు చేసి రూ.74.5 లక్షల నగదు, రూ.100 కోట్ల అక్రమ లావాదేవీలకు సంబంధించిన పత్రాలను స్వాధీనం చేసుకుంది. సురానా గ్రూప్ చైర్మన్‌ నరేంద్ర సురానా, ఎండీ దేవేందర్‌ సురానా, సాయి సూర్య డెవలపర్స్‌ యజమాని సతీష్‌ చంద్ర గుప్తాపై తెలంగాణ పోలీసులు కేసులు నమోదు చేశారు.
మహేష్ బాబు ఎందుకు ఇరుక్కున్నారు?
మహేష్ బాబుకి ఈ కేసుతో ప్రత్యక్షంగా సంబంధం లేదు. కానీ ఆయనకు ఈ కంపెనీల నుంచి డబ్బు వచ్చింది. సురానా గ్రూప్ నుంచి రూ.5.5 కోట్లు, సాయి సూర్య డెవలపర్స్‌ నుంచి రూ.5.9 కోట్లు (ఇందులో రూ.2.5 కోట్లు క్యాష్, రూ.3.4 కోట్లు చెక్‌) ప్రమోషన్‌ పనుల కోసం తీసుకున్నారు. మహేష్ సాయి సూర్య డెవలపర్స్‌కు చెందిన ‘గ్రీన్‌ మీడోస్‌’ ప్రాజెక్ట్‌కు బ్రాండ్‌ అంబాసిడర్‌గానూ ఉన్నారు. ఈ ప్రాజెక్ట్‌లో మోసం జరిగినట్లు ఆరోపణలు ఉన్నాయి. మహేష్‌కు ఈ మోసం గురించి తెలియదని, ఆయన కేవలం ప్రమోషన్‌ చేసి ఉండవచ్చని సమాచారం. ఈడీ ఈ డబ్బు ఎలా వచ్చింది, దాని వెనుక ఏమైనా అక్రమాలు ఉన్నాయా అనే వివరాలు సేకరిస్తోంది.
