కొన్ని మాటలు విన్నప్పుడు, కొన్ని ఘటనలు జరిగినప్పుడు మనకు ఎంతో సంతోషం కలుగుతుంది. అలా సంతోషం కలగడానికి కారణం ఏమిటో తెలుసా? మన స్పందనకు తగినట్లు ఆ సంతోషాన్నిచ్చే హార్మోన్లు మన శరీరంలో విడుదలవుతాయి. ఆ హార్మోన్లు నాలుగు.
అవి 1. ఎండార్ఫిన్లు 2. డోపమైన్‌ 3. సెరొటోనిన్‌ 4. ఆక్సిటోసిన్‌
ఈ హార్మోన్లని అర్థం చేసుకోవడం మనకి చాలా అవసరం. ఎందుకంటే మన సంతోషానికి ఇవే కారణం కాబట్టి.
హార్మోన్‌ ఎండార్ఫిన్‌
మనం వ్యాయామం చేసినప్పుడు మన శరీరం ఈ హార్మోన్‌ విడుదల చేస్తుంది. ఇది వ్యాయామం చేసినపుడు కలిగే నొప్పిని తట్టుకునేందుకు సహకరిస్తుంది. అందుకే మనం మన వ్యాయామాన్ని ఉల్లాసంగా తీసుకోగలుగుతాం. ఎండార్ఫిన్స్‌ మనకి ఆనందాన్ని కలిగిస్తాయి. నవ్వితే కూడా ఎండార్ఫిన్స్‌ చాలా చక్కగా విడుదలవుతాయి. మనం రోజుకి కనీసం 30 నిముషాల వ్యాయామం చేయాలి. హాస్య సంబంధిత విషయాలను చదవటం కానీ చూడటం కానీ చేస్తే రోజుకి సరిపడా ఎండార్ఫిన్స్‌ లభిస్తాయి.
హార్మోన్‌ డోపమైన్‌
మన జీవితంలో చిన్నవో, పెద్దవో లక్ష్యాలను సాధిస్తూ ఉంటాం. ఆ సందర్భాలకు తగినంత డోపమైన్‌ లభిస్తూ ఉంటుంది. మనకి ఇంటి దగ్గరో, ఆఫీసులోనో ప్రశంసలు దొరికినప్పుడు సంతృప్తిగా అనిపిస్తుంది. అది డోపమైన్‌ విడుదల అవటం వలనే. మనకు ఉద్యోగం దొరికితేనో, కారు కొంటేనో, ఇల్లు సమకూరితేనో, కొత్త అధునాతన వస్తువులు కొన్నప్పుడో ఈ డోపమైన్‌ విడుదల అవుతుంటుంది. అప్పుడు మనం ఆనందపడతాం. మనం షాపింగ్‌ చేసినప్పుడు ఎందుకు ఆనందంగా అనిపిస్తుందో తెలిసిందా.. డోపమైన్‌ వల్లే..
హార్మోన్‌ సెరెటోనిన్‌
మన వల్ల వేరొకరు ఆనందపడినప్పుడు, మనం వేరొకరికి ఉపకారం చేసినప్పుడు ఇది విడుదల అవుతుంది. సాటివాకికిగానీ ప్రకృతికి గానీ సమాజానికిగానీ మంచి చేయగలిగినప్పుడు సెరిటోనిన్‌ విడుదల అవుతుంది. అంతేకాదు. ఒకరి సమస్యలకు, ప్రశ్నలకు.. సలహాలు, సమాధానాలు బ్లాగ్స్‌ రూపంలోనో, ఫేస్‌బుక్‌ గ్రూపుల రూపంలోనో ఇవ్వగలిగినప్పుడు కూడా ఈ సెరిటోనిన్‌ విడుదల అయ్యి ఆనందంగా అనిపిస్తుంది. ఎందుకంటే మన విలువైన సమయాన్ని మరొకరికి సాయం చేసేందుకు ఉపయోగించడం మనకి సంతోషాన్ని ఇస్తుంది.
హార్మోన్‌ ఆక్సిటోసిన్‌
మనం తోటివారితో అనుబంధాన్ని పెంచుకుని వారికి దగ్గర అయినప్పుడు ఇది విడుదల అవుతుంది. మనం మన స్నేహితులనో కుటుంబసభ్యులనో ఆలింగనం చేసుకున్నప్పుడు ఆక్సిటోసిన్‌ విడుదల అవుతుంది. మున్నాభాయ్‌ అనే హిందీ సినిమాలో చెప్పినట్టు నిజంగా ఒక ఆత్మీయ ఆలింగనం మంత్రం వేసినట్లుగా మాయ చేసి మనసుని కుదుటపరుస్తుంది. అదేవిధంగా కరచాలనం, భుజాల చుట్టూ చేయి వేసి భరోసా ఇవ్వటం ద్వారా ఆక్సిటోసిన్‌ విడుదలవుతుంది.
- ఎండార్ఫిన్స్‌ కోసం రోజూ వ్యాయామం చేయాలి
- చిన్న చిన్న లక్ష్యాలను సాధించాలి డోపమైన్‌ కోసం
- సెరొటోనిన్‌ కోసం తోటివారితో స్నేహంగా ఉండాలి
- ఆక్సిటోసిన్‌ కోసం మన పిల్లలను ఆలింగనం చేసుకుంటూ ఆత్మీయులను దగ్గరకు తీసుకుంటూ ఉండాలి
జీవించే పద్ధతిని అలవాటుచేసుకుంటూ ఉంటే ఆనందంగా జీవించగలం. మనం సంతోషంగా ఉంటేనే మన సమస్యలను సవాళ్ళను బాగా పరిష్కరించుకోగలం. పిల్లలు చిరాకుగా ఉన్నప్పుడు వారిని దగ్గరకు తీసుకుని లాలించాలి. అప్పుడు మీ బిడ్డ సంతోషంగా హుషారుగా ఉండగలరు.
పిల్లల కోసం
- ఎండార్ఫిన్స్‌ కోసం ఆరుబయట ఆడుకునేలా ప్రోత్సహించాలి
- డోపమెన్‌ కోసం బిడ్డల చిన్న పెద్ద విజయాలకు ప్రశంసించాలి
- సెరొటోనిన్‌ కోసం సాటివారిని కలుపుకుంటూ వారితో సంతోషాలు పంచుకుంటూ జీవించే అలవాటుని పిల్లలకు అలవాటు చేయాలి
- ఆక్సిటోసిన్‌ కోసం మీ బిడ్డను దగ్గరకు తీసుకుని హత్తుకోండి.
