ఒక్కడే.  

ఒక్కడు మాత్రమే.  

ఫోన్ ఒకటి, ల్యాప్‌టాప్ ఒకటి, ఇంటర్నెట్ కనెక్షన్ ఒకటి… ఇవే ఆయుధాలతో ఇమ్మడి రవి అనే 39 ఏళ్ల యువకుడు తెలుగు సినిమా పరిశ్రమను ఐదేళ్ల పాటు వణికించాడు. రూ. 3,700 కోట్లకు పైగా నష్టం తెచ్చాడు. నెలకు ఐదు కోట్ల రూపాయలు సంపాదించాడు.

ఇది ఎలా సాధ్యమైంది?

2019లో విశాఖపట్నం నుంచి హైదరాబాద్ వచ్చిన రవి ఒక చిన్న ఫ్లాట్‌లో కూర్చుని మొదలు పెట్టాడు. మొదట ఐబొమ్మ ఒక్కటే ఉండేది. కానీ ఆ ఒక్క సైట్‌ను ఎవరూ ఆపలేకపోయారు. ఎందుకంటే అతను రోజూ కొత్త ట్రిక్ వాడాడు.

సైట్ బ్లాక్ అయిందా? వెంటనే మరొక డొమైన్ రెడీ.  

ఆ డొమైన్ బ్లాక్ అయిందా? మరొకటి.  

ఆ విధంగా రెండేళ్లలోనే 900కిపైగా వెబ్‌సైట్లు, 110 డొమైన్లు, 70 మిర్రర్ సైట్లు తయారు చేశాడు. ఒక్కొక్క సైట్‌కి పేరు వేరు, కానీ అన్నీ ఒకే వ్యక్తి చేతిలో.

అతని రహస్యం ఏంటి?

2022లో భారత పౌరత్వం వదిలేశాడు. 80 లక్షల రూపాయలు ఖర్చు పెట్టి కరీబియన్ ద్వీప దేశం సెయింట్ కిట్స్ అండ్ నెవిస్ పాస్‌పోర్ట్ తీసుకున్నాడు. అక్కడ సర్వర్లు పెట్టాడు. ఇండియా నుంచి అప్‌లోడ్ అయిన సినిమా కరీబియన్ సర్వర్‌లో పడితే… మన పోలీసులు ఏమీ చేయలేరు. 

అంతే కాదు. ఫ్రాన్స్, డచ్, దుబాయ్, మయన్మార్, థాయ్‌లాండ్… ఈ దేశాల్లో ఉన్న కొందరు యువకులను అడ్మిన్లుగా చేసుకున్నాడు. టెలిగ్రామ్ సీక్రెట్ గ్రూప్‌లో మెసేజ్ పెడితే చాలు – వాళ్లు సైట్ మార్చేస్తారు, లింక్ మార్చేస్తారు. ఎవరూ ట్రేస్ చేయలేరు.

సినిమా ఎక్కడి నుంచి వచ్చేది?

హైదరాబాద్‌లో జన కిరణ్ కుమార్ అనే వ్యక్తి థియేటర్‌లో రహస్యంగా మొబైల్ తో 100కిపైగా సినిమాలు రికార్డు చేశాడు. బీహార్ నుంచి అశ్వనీ కుమార్ OTT సర్వర్లు హ్యాక్ చేసి ఒరిజినల్ HD ప్రింట్లు దొంగిలించాడు. ఈ మధ్యలో రవి మాత్రమే బ్రిడ్జి. ఒక్క మెసేజ్ – సినిమా సైట్‌లో పడేస్తాడు.

డబ్బు ఎలా వచ్చేది?

యూజర్ సినిమా క్లిక్ చేసిన వెంటనే 1win, 1xbet బెట్టింగ్ యాప్‌కి రీడైరెక్ట్ అయిపోతాడు. ఒక్క రిజిస్ట్రేషన్‌కి 400–800 రూపాయలు కమిషన్. నెలకు 50 లక్షల మంది వస్తే… లెక్క మీరే చూడండి. ఏడాదికి ఇరవై కోట్లు బెట్టింగ్ నుంచి, పన్నెండు కోట్లు యాడ్స్ నుంచి. ఇంకా 50 లక్షల మంది యూజర్ల ఫోన్ నంబర్లు, ఈమెయిల్స్ సైబర్ నేరగాళ్లకు అమ్మేశాడు.

అంత జాగ్రత్తగా ఉన్నవాడు ఎలా దొరికిపోయాడు?

విడాకుల కేసు నడుస్తోంది. ఇండియాలో ఉన్న ప్రాపర్టీలు అమ్ముకోవాలి. అందుకోసం నవంబర్ 14న ఫ్రాన్స్ నుంచి హైదరాబాద్‌కు ఫ్లైట్ బుక్ చేశాడు. ఆ ఒక్క టికెట్ బుకింగ్… అతని పతనానికి కారణమైంది. సైబర్‌క్రైమ్ పోలీసులు ఆరు నెలల నుంచి ట్రాక్ చేస్తున్నారు. ఫ్లైట్ ల్యాండ్ హైదరాబాద్ లో ల్యాండ్ అయిన వెంటనే అరెస్ట్ చేశారు.

ఇప్పుడు అతని ఫ్లాట్‌లో దొరికినవి చూస్తే షాకే. 21 వేల సినిమాలతో నిండిన 15 హార్డ్ డిస్క్‌లు, మూడు ల్యాప్‌టాప్స్, ఆరు సీపీయూలు, ముప్ఫై అయిదు ఫేక్ బ్యాంక్ ఖాతాలు, ముప్ఫై నాలుగు డెబిట్ కార్డులు… మూడు కోట్ల రూపాయలు ఫ్రీజ్.

ఎవరీ ఇమ్మడి రవి? ఎలా మొదలైంది?

విశాఖపట్నం అతని స్వస్థలం. కంప్యూటర్ సైన్స్ గ్రాడ్యుయేట్. 2010లో ER ఇన్ఫోటెక్ అనే కంపెనీ పెట్టి డొమైన్లు, వెబ్ హోస్టింగ్ చేసేవాడు. భార్య, అత్తమామలతో గొడవలు… ఆవమానం…విడాకుల కేసు… ఈ కోపంతోనే 2019లో పైరసీ రంగంలోకి దిగాడని పోలీసుల దర్యాప్తులో తేలింది. సంపాదన లేదని, చేతకాని వాడని భార్య తరచూ హేళన చేసింది. అత్త మామలు కూడా అతన్ని ఎందుకూ పనికిరాని వాడని తిట్టేవారు. ఆ తిట్లు, హేళనలే ఆతనిలో కసిని పెంచాయి. తనకున్న కంప్యూటర్ నాలెడ్జితో 2020 కోవిడ్ లాక్‌డౌన్ సమయంలో ఐబొమ్మని లాంచ్ చేశాడు. “ఉచితంగా హై క్వాలిటీ సినిమాలు” అనే ఆకర్షణతో కోట్ల మందిని ఆకర్షించాడు. 2022లో మరో సైట్ బప్పం టీవీ (bappam.dev) కూడా పెట్టాడు. అది సూపర్ హిట్ అవడంతో పైరసీ రారాజుగా మారాడు. ఈ వ్యవహారంలో ట్విస్ట్ ఏంటంటే అతన్ని పట్టించింది భార్యే. ఆమెతో తెగతెంపులు చేసుకుని, ఇండియాలో ఉన్న ఆస్తులను అమ్మి ఆ డబ్బుతో విదేశాల్లో సెటిల్ అవుదామమనుకున్నాడు. అత్యంత రహస్యంగా కేవలం తన భార్యకు మాత్రమే సమాచారం ఇచ్చి ఇండియాలో అడుగు పెట్టాడు. అయితే అతని భార్య పోలీసుల కంట్రోల్ లో ఉండడంతో పట్టుబడ్డాడు.