విజయవాడ ఎంపీ కేశినేని శివనాథ్‌ (చిన్ని), తిరువూరు ఎమ్మెల్యే కొలికిపూడి శ్రీనివాస్‌ మధ్య ఏర్పడిన వివాదం సీఎం చంద్రబాబుకు ఇరకాటంగా మారింది. లోపల కొలికిపూడిపై కోపం ఉన్నా దాన్ని బయటపెట్టలేక ప్రస్తుతానికి రాజీ మంత్రం పఠిస్తున్నారు. అందుకుఏ వారి మధ్య ఉన్న విభేదాలను పరిష్కరించే బాధ్యతను పార్టీ క్రమశిక్షణా సంఘానికి అప్పగించారు. అయితే సీనియర్‌ నాయకులతో వారి గొడవ గురించి చర్చించినప్పుడు కొలికిపూడి శ్రీనివాస్‌ వైఖరి వల్లే ఇబ్బందులు వస్తున్నట్లు ఆయన అన్నట్లు టీడీపీ నేతలు చెబుతున్నారు. శ్రీనివాస్‌ను కంట్రోల్‌ చేయడం సాధ్యం కావడంలేదని, అలాగని వదిలేస్తే ఇంకా ఇబ్బందులు వస్తాయనే అభిప్రాయంతో చంద్రబాబు ఉన్నట్లు సమాచారం. ఈ నేపథ్యంలోనే విజయవాడ ఎంపీ చిన్నికి తిరువూరు సీటు కోసం తాను రూ.5 కోట్లు ఇచ్చినట్లు కొలికిపూడి శ్రీనివాస్‌ చెప్పడం దానికి తగిన ఆధారాలు చూపించడంతో టీడీపీలో ఒక్కసారిగా కలకలం రేగింది. ఆరోపణలు చేసింది కేశినేని చిన్నిపైనే అయినా అవి తగిలేది మాత్రం లోకేష్‌కేననే అభిప్రాయం పార్టీలో నెలకొంది. ప్రస్తుతం లోకేష్ కోటరీలో చిన్ని అత్యంత క్రియాశీలంగా ఉన్నారు. పేరుకు విజయవాడ ఎంపీ అయినా రాష్ట్రంలోనూ, ఢిల్లీలోనూ పలు ముఖ్యమైన వ్యవహారాలను ఆయన లోకేష్ తరఫున చక్కబెడుతున్నారనే ప్రచారం ఉంది. ఆంధ్రా క్రికెట్‌ అసోసియేషన్‌కు చిన్నిని అధ్యక్షుణ్ణి చేయడం నుంచి ఉర్సా కంపెనీకి రూ.99 పైసలకే భూమి ఇచ్చే ప్రతిపాదన చేయడం వరకూ చాలా విషయాల్లో వారి మధ్య ఆర్థిక సంబంధాలను బహిర్గతం చేసింది. ఇటీవల దసరా ఉత్సవాల సందర్భంగా విజయవాడలోని భవానీపురంలో అత్యంత విలువైన టీటీడీ స్థలాన్ని ఎగ్జిబిషన్‌ గ్రౌండ్స్‌ కోసం తీసుకునే విషయంలోనూ వారి వ్యాపార స్వార్థం ఉందని బయటకు పొక్కింది. విశాఖ, విజయవాడ సహా రాష్ట్రంలోని ముఖ్యమైన ప్రాంతాల్లో విలువైన భూముల్ని చేజిక్కించుకునే పనిలో చిన్ని చాలా వేగంగా అడుగులు వేస్తున్నట్లు తెలుస్తోంది. అలాగే పలు భారీ ఆర్థిక లావాదేవీల్లోనూ ఆయన ప్రమేయం ఉన్నట్లు టీడీపీలో ప్రచారం జరుగుతోంది. ఇవన్నీ సీఎం తనయుడు లోకేష్‌కి తెలిసే జరుగుతున్నట్లు చెబుతున్నారు.
చిన్నికి పెత్తనం.. పరోక్షంగా లోకేష్‌ని టార్గెట్‌ చేసిన కొలికిపూడి
ఈ నేపథ్యంలోనే తిరువూరు, నందిగామ, జగ్గయ్యపేట నియోజకవర్గాల్లో పెత్తనం ఎంపీ చిన్నికి దక్కింది. ఆ నియోజకవర్గాల్లో ఎమ్మెల్యేలను పక్కనపెట్టి చిన్ని తన మనుషులతో ఇసుక, మద్యం, కాంట్రాక్టులు సహా ఇతర అన్ని వ్యవహారాలను నడిపిస్తున్నారు. విజయవాడ వెస్ట్, మైలవరం నియోజకవర్గాల్లోనూ ఆయన జోక్యం ఉందని చెబుతున్నారు. దీంతో అక్కడి ఎమ్మెల్యేలు శివనాథ్‌ తీరుపై లోలోపల రగిలిపోతున్నారు. అయితే వారంతా బహిరంగంగా మాట్లాడలేకపోతున్నా తిరువూరు ఎమ్మెల్యే కొలికిపూడి శ్రీనివాస్‌ మాత్రం తేనె తుట్టెను కదిలించారు. నియోజకవర్గంలో తన అధికారాలను కత్తిరించి ఎంపీ చిన్నికి పెత్తనం ఇవ్వడంతో తీవ్ర ఆగ్రహంతో ఉన్న ఆయన తిరుగుబాటు స్వరం వినిపిస్తున్నారు. ఈ నేపథ్యంలోనే చిన్నికి తిరువూరు సీటు కోసం డబ్బు ఇచ్చిన విషయాన్ని బయటపెట్టారు. తద్వారా చంద్రబాబు, లోకేష్‌లకు పరోక్షంగా మున్ముందు తన వైఖరి ఎలా ఉండబోతుందో చెప్పినట్లయిందని విశ్లేషకులు చెబుతున్నారు. లోకేష్‌కి అత్యంత అనుయాయుడిగా ఉన్న ఎంపీపై గురి పెట్టడం ద్వారా తాను దేనికైనా సిద్ధమనే సిగ్నల్‌ ఇచ్చినట్లు కనబడుతోంది. ఇప్పటికి చిన్నితో సరిపెట్టినా భవిష్యత్తులో లోకేష్, చంద్రబాబుపైనా ఆయన తిరుగుబాటు చేసే అవకాశం ఉందని తెలుస్తోంది. ఎందుకంటె ఇప్పటికే తిరువూరులో ఒక వర్గం టీడీపీ పూర్తిగా ఎమ్మెల్యేగా ఉన్న కొలికిపూడిని వ్యతిరేకిస్తోంది. ఆ వర్గం అంతా చిన్ని కనుసన్నుల్లో పని చేస్తోంది. అందుకే కొలికిపూడి ఎంపీ చిన్నిని టార్గెట్‌ చేసి వార్నింగ్‌ బెల్‌ మోగించారు.
లోలోన మండిపడుతూనే బాబు రాజీ మంత్రం
దీంతో ఉలిక్కిపడిన చంద్రబాబు దుబాయ్‌లో ఉన్నా సరే కొలికిపూడికి ఫోన్‌ చేసి మంతనాలు జరిపారు. తొందరపడవద్దని అంతా తాను చూసుకుంటానని చెప్పినా ఆయనకు ఎలా చెక్‌ పెట్టాలనే దానిపైనే తర్జనభర్జనలు పడుతున్నారు. అందులోభాగంగానే శుక్రవారం చిన్ని, కొలికిపూడి మధ్య రాజీ కుదర్చాలని పార్టీ క్రమశిక్షణా సంఘం నేతలకు సూచించి ప్రస్తుతానికి ఈ వ్యవహారాన్ని సర్దుబాటు చేయడానికి ప్రయత్నిస్తున్నారు. అయితే ఈ వ్యవహారంలో తన పూర్తి మద్ధతు మాత్రం విజయవాడ ఎంపీ చిన్నికే ఇస్తున్నట్లు తెలుస్తోంది. తన కుమారుడికి అత్యంత సన్నిహితుడు కావడంతో ఎంపీని వెనకేసుకుని రాక తప్పని పరిస్థితి ఉంది. అదే సమయంలో కొలికిపూడి తిరుగుబాటు స్వరానికి భయపడి రాజీ మంత్రం పఠిస్తున్నారు. పైకి రాజీ చేయాలని అంటున్నా సమావేశంలో కొలికిపూడినే ఆయన తప్పు పట్టినట్లు సమాచారం. చిన్నిపైన ఎన్ని ఆరోపణలు వచ్చినా, కొలికిపూడి ఆయన అవినీతిపై ఆధారాలతో సహా సమర్పించినా వాటిని పట్టించుకోవడంలేదు. పార్టీ సిద్ధాంతం తెలియని వారికి సీట్లు ఇవ్వడం వల్లే ఇలాంటి పరిస్థితి వచ్చిందంటూ నర్మగర్భ వ్యాఖ్యలు చేశారు. పార్టీ సిద్ధాంతం అంటే ఆయన దృష్టిలో తనకు విధేయుడిగా ఉండడమే. అది కొలికిపూడి చేయడంలేదని ఆయనపై భగ్గుమంటున్నారు. తన కుమారుడికి వీర విధేయుడిగా ఉంటూ చెప్పిన పనులన్నీ చేస్తుండడంతో చిన్నికి వత్తాసు పలుకుతున్నారనే వాదన వినిపిస్తోంది. ఏదైనా చిన్ని, కొలికిపూడి వ్యవహారంలో చంద్రబాబు కక్కలేక మింగలేక ఉన్నట్లు స్పష్టమవుతోంది.
