అల్లూరి సీతారామరాజు జిల్లా మారేడుమిల్లి–చింతూరు అడవి ప్రాంతంలో మంగళవారం ఉదయం భారీ ఎన్‌కౌంటర్ జరిగింది. ఉదయం 6 గంటల నుంచి 7 గంటల మధ్య మావోయిస్టులు–పోలీసుల మధ్య తీవ్రంగా కాల్పులు జరిగాయి. ఈ ఎదురు కాల్పుల్లో మొత్తం ఆరుగురు మావోయిస్టులు మృతి చెందినట్లు అధికారులు ధృవీకరించారు.
హతమైన వారిలో హిడ్మా కూడా
మరణించిన వారిలో దేశవ్యాప్తంగా వేట కొనసాగుతున్న మావోయిస్ట్ కేంద్ర కమిటీ అగ్రనేత మాడ్వి హిడ్మా ఉన్నట్లు పోలీస్ వర్గాలు స్పష్టం చేశాయి. అతనితో పాటు అతని భార్య, అత్యంత నమ్మకస్తులైన బాడీగార్డులు కూడా నేలకొరిగినట్లు సమాచారం. హిడ్మా మీద ఛత్తీస్‌గఢ్, ఒడిశా, ఏపీ రాష్ట్రాల్లో అనేక కేసులు ఉన్నాయి. అతను PLGA బటాలియన్–1 కమాండర్.
భారీ కూంబింగ్ – మూడు రాష్ట్రాల సమన్వయం
ఈ ఆపరేషన్‌లో ఏపీ గ్రేహౌండ్స్, ఛత్తీస్‌గఢ్ సెక్యూరిటీ ఫోర్సెస్, ఒడిశా స్పెషల్ ఆపరేషన్ టీంలు కలిసి విస్తృత కాంబింగ్ నిర్వహించాయి.
గత వారం నుంచి ఈ ప్రాంతాల్లో మావోయిస్టుల కదలికలు పెరిగినట్లు ఇంటెలిజెన్స్‌కు సమాచారం రావడంతో భారీగా దళాలు మోహరించారు.
వేదికగా మారిన మారేడుమిల్లి–అల్లూరి అడవులు
మావోయిస్టులు సమావేశం జరుగుతోందన్న సమాచారం ఆధారంగా భద్రతా దళాలు అడవులను చుట్టుముట్టాయి. కొద్దిసేపట్లోనే ‘ఎక్స్చేంజ్ ఆఫ్ ఫైర్’ ముమ్మరమైంది.
స్థలంలో AK-47లు, కార్ట్రిడ్జ్‌లు, పేలుడు పదార్థాలు పెద్ద ఎత్తున దొరికినట్లు అధికారుల సమాచారం.
డీజీపీ హరీష్ కుమార్ గుప్తా స్పందన
డీజీపీ హరీష్ కుమార్ గుప్తా ప్రకారం:
- “అడవుల్లో మావోయిస్టుల చలనం బలంగా ఉందన్న ఆధారాలతో కాంబింగ్ ప్రారంభించాం.”
- “ఎదురు కాల్పుల్లో ఆరుగురు మావోయిస్టులు చనిపోయారు. హిడ్మా మృతి మావోయిస్టు సంచలనానికి భారీ దెబ్బ.”
- “ఇంకా కోంబింగ్ కొనసాగుతోంది.”
హిడ్మా మరణం – నక్సల్ ఉద్యమానికి పెద్ద దెబ్బ
హిడ్మా దేశవ్యాప్తంగా అత్యంత ప్రమాదకర మావోయిస్టుల్లో ఒకరిగా భావిస్తారు. అతనిపై కోటికి పైగా రివార్డు ఉంది. సుక్మా–బీజాపూర్ ప్రాంతాల్లో జరిగిన అనేక తీవ్ర దాడులకు అతనే ప్రణాళిక కర్తగా ఇంటెలిజెన్స్ చెబుతుంది.
అతని హతం దండకారణ్య నక్సల్ జోన్ మొత్తానికి భారీ షాక్‌గా భద్రతా వర్గాలు భావిస్తున్నాయి. ఎన్‌కౌంటర్ తర్వాత ప్రాంతంలో మరింత దళాలు మోహరించబడ్డాయి. అడవిలో ఇంకా మావోయిస్టులు ఉండే అవకాశం ఉన్నందున పూర్తిగా శోధిస్తున్నారు.
మరోవైపు కృష్ణా జిల్లాతో పాటు విజయవాడ, కాకినాడలో మొత్తం 31 మంది మావోయిస్టులను పోలీసులు అరెస్ట్ చేసినట్లు ఏడీజీ మహేశ్ చంద్ర లడ్డా తెలిపారు. వీరిలో 9 మంది కేంద్ర కమిటీ సభ్యులు ఉన్నారని వివరించారు.
స్వాధీనం చేసుకున్న ఆయుధాలు, పేలుడు పదార్థాలివీ…
AK 47 – 2
పిస్టోల్ -1
రివాల్వర్ -1
సింగిల్ బోర్ ఆయుధం -1
ఎలక్ట్రికల్ డిటోనేటర్లు -1525
నాన్ ఎలక్ట్రికల్ డిటోనేటర్లు -150
ఎలక్ట్రికల్ వైర్ బండిల్ -1
కెమెరా ఫ్లాష్ లైట్ -1
కటింగ్ బ్లేడ్ -1
ప్యూజ్ వైర్ -25 మీటర్లు
కిట్ బ్యాగులు -7
