నేటి ఆధునిక కాలంలో సాంకేతిక మార్పులు అత్యంత వేగంగా చోటుచేసుకుంటున్నాయి. ఆర్టిఫిషియల్ ఇంటెలిజెన్స్ (AI), డేటా సైన్స్, సైబర్ సెక్యూరిటీ వంటి రంగాలు కెరీర్ పరంగా ముందంజలో ఉండటంతో, చాలామంది విద్యార్థులు ఆ వైపుగానే మొగ్గు చూపుతున్నారు. ఈ క్రమంలో మెకానికల్, సివిల్, ఎలక్ట్రికల్ వంటి “కోర్ ఇంజనీరింగ్” విభాగాల ప్రాముఖ్యత తగ్గిందా? అనే సందేహం కలగడం సహజం. లోతుగా పరిశీలిస్తే, సుస్థిర ఆర్థిక వృద్ధికి, సాంకేతిక ప్రగతికి కోర్ ఇంజనీరింగ్ అత్యంత కీలకమని స్పష్టమవుతోంది.

​ఐటీ రంగానికి మించిన భారీ డిమాండ్ కోర్ ఇంజనీరింగ్‌లో అవకాశాలు తక్కువ అనే అపోహ చాలా మందిలో ఉంది. కానీ ఐటీ రంగం సాఫ్ట్‌వేర్ సేవలపై ఆధారపడితే, కోర్ రంగాలు దేశ మౌలిక సదుపాయాల కల్పనపై ఆధారపడి ఉంటాయి. ప్రస్తుతం భారతదేశం మౌలిక సదుపాయాల కల్పనలో (Infrastructure) దూసుకుపోతోంది. నేషనల్ హైవేలు, మెట్రో రైల్ ప్రాజెక్టులు, స్మార్ట్ సిటీలు, ఎయిర్‌పోర్టులు, పోర్టులు, ఇండస్ట్రియల్ కారిడార్ల నిర్మాణం వల్ల సివిల్, మెకానికల్, ఎలక్ట్రికల్ ఇంజనీర్లకు నిరంతర డిమాండ్ ఉంది. అలాగే ‘మేక్ ఇన్ ఇండియా’ పథకం కింద డిఫెన్స్ మ్యానుఫ్యాక్చరింగ్, సెమీకండక్టర్ పరిశ్రమలు, క్వాంటం కంప్యూటింగ్ ల్యాబ్స్ వంటివి ఎలక్ట్రానిక్స్, ఇతర కోర్ ఇంజనీర్ల అవసరాన్ని మునుపటి కంటే పెంచాయి.

​అంతర్జాతీయ అవకాశాలు.. సరైన సమయం
ప్రపంచవ్యాప్తంగా ఇప్పుడు పునరుత్పాదక ఇంధనం (Renewable Energy), సుస్థిరత (Sustainability) వైపు అడుగులు పడుతున్నాయి. సోలార్ పవర్, విండ్ ఎనర్జీ, ఎలక్ట్రిక్ వాహనాలు (EV), ఎనర్జీ స్టోరేజ్, గ్రీన్ హైడ్రోజన్ వంటి అత్యున్నత రంగాలు పూర్తిగా కోర్ ఇంజనీరింగ్ నైపుణ్యంపైనే ఆధారపడి ఉన్నాయి. ఐటీ రంగం వేగంగా మార్పులకు లోనవుతుంటుంది, కానీ ఈ పునాది పరిశ్రమలు దీర్ఘకాలిక స్థిరత్వాన్ని, నిరంతర వృద్ధిని అందిస్తాయి. ప్రస్తుతం ఎక్కువ మంది విద్యార్థులు ఐటీని ఎంచుకుంటున్న తరుణంలో, కోర్ రంగాల్లో నైపుణ్యం కలిగిన వారి కొరత (Talent Gap) ఏర్పడుతోంది. ఈ తక్కువ సరఫరా-ఎక్కువ డిమాండ్ ఉన్న సమయంలో కోర్ ఇంజనీరింగ్ ఎంచుకోవడం వల్ల భవిష్యత్తులో మెరుగైన వేతనాలు, వేగవంతమైన కెరీర్ వృద్ధి లభించే అవకాశం ఉంది.

​డిజిటల్ యుగంలో కోర్ ఇంజనీరింగ్ ఆధునిక కోర్ ఇంజనీరింగ్ అంటే కేవలం సంప్రదాయ పద్ధతులు మాత్రమే కావు. ఇది ఆధునిక డిజిటల్ టెక్నాలజీల అద్భుత కలయిక. కోర్ ఇంజనీరింగ్ ఇప్పుడు కేవలం మ్యాన్యువల్ లెక్కలకే పరిమితం కాకుండా, రోబోటిక్స్, ఆటోమేషన్, సిమ్యులేషన్ టూల్స్, 3D ప్రింటింగ్ వంటి సాంకేతికతలతో అనుసంధానమైంది. సివిల్ ఇంజనీర్లు అడ్వాన్స్‌డ్ సాఫ్ట్‌వేర్, డేటా అనలిటిక్స్‌ను ఉపయోగిస్తుంటే, ఎలక్ట్రికల్ ఇంజనీర్లు స్మార్ట్ గ్రిడ్లు, IoT (Internet of Things) అప్లికేషన్లపై పని చేస్తున్నారు. ఈ మార్పుల వల్ల కోర్ ఇంజనీర్లకు ఐటీ రంగంలో లాగే అత్యున్నత స్థాయి నైపుణ్యం కలిగిన ఉద్యోగాలు లభిస్తున్నాయి.

​విజయానికి తొలిమెట్టు – బలమైన పునాది
ఈ రంగంలో రాణించాలంటే విద్యార్థులు తమ కోర్ సబ్జెక్టులపై పట్టు సాధించడం అత్యంత కీలకం. థర్మోడైనమిక్స్, మెటీరియల్ సైన్స్, ఫ్లూయిడ్ మెకానిక్స్, స్ట్రక్చరల్ అనాలిసిస్, సర్క్యూట్ అనాలిసిస్ వంటి ప్రాథమిక అంశాలు పునాది వంటివి. వీటితో పాటు ప్రోగ్రామింగ్ (C, Python), డేటా అనాలిసిస్, సిమ్యులేషన్ సాఫ్ట్‌వేర్‌లు, BIM ప్లాట్‌ఫారమ్‌ల వంటి డిజిటల్ స్కిల్స్‌ను నేర్చుకుంటే ఉద్యోగ అవకాశాలు మరింత మెరుగుపడతాయి. దీనినే “కోర్ + డిజిటల్” విధానం అని అంటారు. ఇది విద్యార్థులను ఇతరుల కంటే భిన్నంగా చూపిస్తుంది.

​తరగతి గది నుండి క్షేత్రస్థాయి అనుభవం వరకు
కెరీర్ వృద్ధిలో కేవలం పుస్తక జ్ఞానం సరిపోదు, ప్రాక్టికల్ ఎక్స్‌పోజర్ కూడా చాలా అవసరం. మ్యానుఫ్యాక్చరింగ్ ప్లాంట్లు, కన్స్ట్రక్షన్ సైట్లు లేదా ఎనర్జీ ప్రాజెక్టులలో ఇంటర్న్‌షిప్ చేయడం ద్వారా రియల్ వరల్డ్ ప్రాబ్లమ్స్ ఎలా ఉంటాయో తెలుస్తుంది. సోలార్ వెహికల్స్, రోబోటిక్స్ టీమ్స్ లేదా ఆటోమేషన్ ఛాలెంజెస్ వంటి స్టూడెంట్ ప్రాజెక్టులలో పాల్గొనడం వల్ల థియరీకి, ప్రాక్టికల్‌కు మధ్య ఉన్న వ్యత్యాసం తగ్గుతుంది. పరిశ్రమలు గుర్తించిన సర్టిఫికేషన్లు, హ్యాండ్స్-ఆన్ ట్రైనింగ్ అదనపు బలాన్ని ఇస్తాయి.

​కోర్ ఇంజనీరింగ్ ఐటీకి ప్రత్యామ్నాయం కాదు అది ఒక పటిష్టమైన పునాది. మారుతున్న కాలానికి అనుగుణంగా డిజిటల్ నైపుణ్యాలను జోడించుకుంటే, కోర్ ఇంజనీర్లు రాబోయే దశాబ్దాల పాటు అత్యున్నత డిమాండ్‌లో ఉంటారు. సుస్థిర కెరీర్, సమాజంపై గొప్ప ప్రభావం చూపాలనుకునే వారికి కోర్ ఇంజనీరింగ్ ఒక గొప్ప వేదిక.