దేశవ్యాప్తంగా ఇప్పుడు అందరి కళ్లు పశ్చిమ బెంగాల్‌పైనే ఉన్నాయి. 294 అసెంబ్లీ స్థానాలకు జరుగుతున్న ఈ ఎన్నికలు కేవలం ఒక రాష్ట్రానికే పరిమితం కాకుండా జాతీయ రాజకీయాల గమనాన్ని మార్చేవిగా కనిపిస్తున్నాయి. ఒకవైపు ముఖ్యమంత్రి మమతా బెనర్జీ తన సంక్షేమ కోటను కాపాడుకోవాలని చూస్తుంటే, మరోవైపు బీజేపీ తన ‘మిషన్ బెంగాల్’ను సక్సెస్ చేసేందుకు సర్వశక్తులూ ఒడ్డుతోంది.

​భవానీపూర్ సవాల్: గతం నేర్పిన పాఠం
​గత 2021 ఎన్నికల్లో మమతా బెనర్జీ ఒక చారిత్రక తప్పిదం చేశారు. తన సొంత నియోజకవర్గం భవానీపూర్‌ను వదిలి బీజేపీ నేత సువేందు అధికారి విసిరిన సవాల్‌ను స్వీకరించి నందిగ్రామ్‌కు వెళ్లారు. అక్కడ కేవలం 1,956 ఓట్లతో ఓడిపోవడం ఆమె రాజకీయ జీవితంలో ఒక మాయని మచ్చగా మిగిలిపోయింది. అయితే, ఉప ఎన్నికలో భవానీపూర్ ఓటర్లు ఆమెకు 58 వేల పైచిలుకు మెజారిటీ ఇచ్చి గెలిపించారు. ఈ చేదు అనుభవాన్ని దృష్టిలో ఉంచుకుని ఈసారి ఆమె ఎక్కడికీ వెళ్లకుండా తన ‘సేఫ్ జోన్’ అయిన భవానీపూర్ నుంచే పోటీ చేస్తున్నారు. కానీ బీజేపీ ఇక్కడ కూడా ఆమెను వదలడం లేదు. సువేందు అధికారిని మళ్ళీ ఆమెపైనే బరిలోకి దించి మానసికంగా ఆమెను కట్టడి చేసే వ్యూహం పన్నింది.

​సంక్షేమ పథకాలే ‘లైఫ్ లైన్’
​మమతా బెనర్జీ విజయావకాశాలు పూర్తిగా ఆమె అమలు చేసిన ‘డైరెక్ట్ క్యాష్ ట్రాన్స్‌ఫర్’ పథకాలపైనే ఆధారపడి ఉన్నాయి. ముఖ్యంగా ‘లక్ష్మీర్ భండార్’ పథకం ద్వారా కోట్లాది మంది మహిళల ఖాతాల్లోకి నెలకు ₹1,500 నుండి ₹1,700 జమ అవుతుండటం ఆమెకు పెద్ద ప్లస్ పాయింట్. దీనికి తోడు ఎన్నికల షెడ్యూల్ రావడానికి కొద్దిరోజుల ముందే ‘బంగ్లార్ యువ సాథి’ పేరుతో నిరుద్యోగ భృతిని ప్రకటించడం యువతను ఆకర్షించే ఎత్తుగడ వేశారు. అయితే బీజేపీ దీనిని ‘దోపిడీ రాజకీయం’ (Dole Politics) అని విమర్శిస్తోంది. తాము అధికారంలోకి వస్తే ఏకంగా నెలకు ₹3,000 ఇస్తామని హామీ ఇవ్వడం ద్వారా మమత ఓటు బ్యాంకుకు బీజేపీ గండి కొట్టాలని చూస్తోంది.

​ఈసీ ‘సర్జికల్ స్ట్రైక్’ – అధికారుల బదిలీల వెనుక మర్మం
​ఎన్నికల నోటిఫికేషన్ రాగానే కేంద్ర ఎన్నికల సంఘం బెంగాల్ అడ్మినిస్ట్రేషన్‌పై ఉక్కుపాదం మోపింది. రాష్ట్ర ప్రభుత్వంపై పక్షపాత ఆరోపణలు రాకుండా ఉండటానికి కీలక అధికారులను మార్చేసింది.
​డీజీపీ మార్పు: డీజీపీ పీయూష్ పాండేపై గతంలో అనేక ఫిర్యాదులు రావడంతో, ఆయన స్థానంలో సిద్ధ్ నాథ్ గుప్తాను నియమించారు. శాంతిభద్రతల విషయంలో ఎక్కడా రాజీ పడకూడదనేది ఈసీ వ్యూహం.
​ప్రధాన కార్యదర్శి (CS) బదిలీ: అత్యంత కీలకమైన సిఎస్ నందిని చక్రవర్తిని బదిలీ చేసి, దుష్యంత్ నారియాలాకు బాధ్యతలు అప్పగించడం ద్వారా పరిపాలనపై పట్టు సాధించింది.
​గ్రౌండ్ లెవల్ మార్పులు: సుమారు 19 మంది ఐపీఎస్ అధికారులు, పలువురు కలెక్టర్లను మార్చడం ద్వారా క్షేత్రస్థాయిలో రాజకీయ ప్రభావం లేకుండా ఈసీ జాగ్రత్త పడుతోంది. దీనిపై మమత “ఇది కేంద్ర ప్రభుత్వ కుట్ర” అని ఆరోపిస్తుంటే, “న్యాయమైన ఎన్నికల కోసమే ఇది” అని బీజేపీ సమర్థిస్తోంది.

​బీజేపీ ‘డబుల్ ఇంజిన్’ నినాదం
​నరేంద్ర మోదీ, అమిత్ షా ద్వయం బెంగాల్‌ను ఈసారి ప్రతిష్టాత్మక తీసుకున్నారు. గత ఎన్నికల్లో 77 స్థానాలకు పరిమితమైన బీజేపీ, ఈసారి 200 దాటాలనే లక్ష్యంతో ఉంది. అవినీతి, చొరబాటుదారులు, సందేశ్‌ఖాలీ వంటి ఘటనలను ప్రధానంగా ప్రస్తావిస్తూ హిందూ ఓటు బ్యాంకును ఏకీకృతం చేసే ప్రయత్నం చేస్తోంది. మరోవైపు, 7వ పే కమిషన్ అమలు చేస్తామనే హామీతో లక్షలాది మంది ప్రభుత్వ ఉద్యోగులను తనవైపు తిప్పుకోవాలని చూస్తోంది.

​మే 4న తేలబోయే భవితవ్యం
​బెంగాల్ ఓటరు ఎప్పుడూ నిశ్శబ్దంగా ఉండి షాక్ ఇస్తుంటాడు. మమత తన ‘బంగ్లార్ మే’ (బెంగాల్ కూతురు) ఇమేజ్‌ను నమ్ముకోగా, మోదీ నాయకత్వాన్ని బెంగాల్ ప్రజలు ఆహ్వానిస్తారని బీజేపీ భావిస్తోంది. ఏప్రిల్ 23, 29 తేదీల్లో జరిగే పోలింగ్, మే 4న వచ్చే ఫలితాలు బెంగాల్ గడ్డపై ఎవరి జెండా ఎగురుతుందో తేల్చనున్నాయి.